اهـــل الــنـــفـــــاق
البارحه من قبل لايطلع النور = قدامي الافكار صفن طوابير
واخذتهن بالدور طابور طابور = وسطرتهن بالقاف من بعد تفكير
ولبستهن من شعري احساس وشعور = حتى غدن مثل السيوف البواتير
للشعر والشاعر مواقيف وحضور = ولكل ماقف مفردات وتعابير
بعض الليالي لو تعذرت معذور= وبعض الليالي ماتفيد المعاذير
انحت حجر واسبح بغبات وبحور = وانظم درر واصخر القاف تصخير
ماروح ادور زور من شاهد الزور = ولابيع ميقافي بحمر الدنانير
لي معجبين ولي من الناس جمهور = لو الشعر ماهو بكثر الجماهير
كم شاعرن من دون الاعلام مغمور = ارهى من اللي واردن جمة البير
بس القصيد اللي بالاعلام منشور = خلى يصير اللي مهو لازم يصير
لاقاضين عادل ولافيه دستور = ولو احسب النقاد كثر الصقاقير
لكن لاسوو ولاجالهم دور = والقافله يدهن لها السير وتسير
والخافي اعظم واكثر الناس مجبور = يساير العالم على الشر والخير
وش وخر اللي يحكم الراي والشور = ذخيرة اللي يحتمون المظاهير
ووش قدم اللي دايم يلف ويدور = اصبح هو اللي يقطع الراي ويشير
الشيخ من عنده عمارت وقصور = ويملك رصيدن ماتجيه المخاسير
اصبح يشب النار وقدوره تفور = ويقول انا عنتر وانا سالم الزير
وصكوا عليه اهل الرياء واصبحوا سور = وقالوا له انت اطلق شنب بالمناعير
وصدق ومنهم كل ماجاه مطيور = ماباقي الا ينفض الريش ويطير
يصرح ويعلن وفي زوده قصور = عشبن خضر لكن ماله نواوير
غادي ومن نهابة المال محصور = دايم على بيته ورود ومصادير
ويكرم ويهدي وفي ربعه يبور = واهل النفاق تقول مامنك تقصير
قدم العرب بالمد والجود مشهور = واليا عطى مده تعدى المعايير
وان جاله المحتاج يشكي من الجور = عطاه عذرن مثل روس المسامير
ومن شوفته في مجلسه دمه يفور = ولاوده بشوف الجماعه مسايير
لو انه اقرب له من الحلق لزور = واخير له من عابدين الدنانير
هو يحسب انه فاهقن كل مسطور = لكن ماله عند الاجواد تقدير
لاقول له صاحي ولاقول مسحور = بس الاكيد انه يسوق الفواتير
وحظي بري ماعم والعلم مقصور = على عظامن جبرت عقب تكسير
كم تاجرن ماله على الناس منثور = ريف الفقارى فالليال المعاسير
ماقصده انه يصبح انسان مشهور = يرجي جزاها من ولي المقادير
يالله عسى من يفعل الخير ماجور = والا المنافق ماله الا زمهرير